رباعيَّــــات ليثيَّــة [الأرشيف]

د. أحمد الليثي

07-10-2007, 06:15 PM

قعدت في بيت الله اقرا آيات قرآن
واستنى صلاة الفجر وقلبي فِ اطمئنان
سحبني من قفايا العسكر وجروني لابو زعبل
وقالوا يابن اللئيمة، دي أوامر السلطان.

د. أحمد الليثي

07-10-2007, 06:18 PM

تعـالَ اسمع كلامـي وركِّـز يا ولـه
أيام الفرح راحت ومش باقي إلا البهدلة
ده عصر حلق حوش بن المعلم جلا جلا
وان فهمت كلامي تبقى فهمت المسألة.

د. أحمد الليثي

07-10-2007, 06:19 PM

جوَّاية كلام؟ لأ. جوَّاية جروح ومآسي.
إن بُحت وقلت الحق، قالوا: كلام قاسي
وِان قفلت مليون بُق، راح تنفجر راسي
يعني أطق واموت واعمل كمان ناسي؟

الشربينى خطاب

07-10-2007, 06:36 PM

الأستاذ الفاضل / د 0 أحمد الليثي
من قصيدة حمار ينضم لكفاية
أهديك هذه الأبيات وكل عام وانت بخير

لنا هانكسف من اسمي
ولا مهنتي وجنسي
طب هانكسف من إيه ؟
كتبوا ف شهادة قيدي
عدم المؤاخذه يا سيدي
جحش وحمار يا بيه 00!!
****
ياما شيلوني مآسي
وجواري كتير وغوازي
وذنوب بالكوم ومعاصي
لا حرنت ولا قلت ليه ؟
****
صُيرتْ اتجرح ضهري
سكتْ قاموا زودوا قهري
حتي اللي ماسك صرعي
راكب علي حمولي
متجسطن ولا همه
وبهز لي ف رجليه
فاهم كلامي وفاهمني
يا اللي اتخدت بسببي
داخل الليمان والسجن
ويَّا الحراميه
حطوا سعادة البيه

د. أحمد الليثي

07-10-2007, 06:37 PM

هي الخلق مش دارية ولا انا مش داري
إن قلت للواد انصِلِح، أو للبنت: إدَّاري
يبصُوا لي بصّة عجب. ليه؟ ما انا داري
وابقى زي ما اكون خرجت أيه؟ من داري.

د. أحمد الليثي

07-10-2007, 06:51 PM

أستاذنا الفاضل الشربيني خطاب
تقبل الله منا ومنكم. وأهديك بدوري هذه الأبيات المتواضعة على لسان حمار "كفاية":

صبرت صبر جبال، وشلت الحمول أشكال
ما نهقت كلمة لأ، ولا قلت مرة محال
لا رفسة للمفتري، ولا ضربة للحمَّال
ولما قلت "كفاية" قالوا حمار محتال.

محمد إبراهيم الحريري

07-10-2007, 07:10 PM

د. سلطان الحريري

07-10-2007, 08:14 PM

الحبيب الدكتور الليثي:
سعادتي كبيرة بمصافحة حروفك ، وكل عام وأنت بخير ، وتقبل طاعتك ...
نص جميل كصاحبه.
لك الحب كله

د. أحمد الليثي

07-10-2007, 08:48 PM

الحبيب الدكتور الليثي:
سعادتي كبيرة بمصافحة حروفك ، وكل عام وأنت بخير ، وتقبل طاعتك ...
نص جميل كصاحبه.
لك الحب كله

الفاضل الدكتور الحريري
أسعدني مرورك، وأسعدني تعليقك. وتقبل الله منا ومنكم.

دمت سالماً.

مأمون المغازي

07-10-2007, 09:00 PM

مروة عبدالله

08-10-2007, 12:22 AM

الأديب د. أحمد الليثي

رباعيات ليثية متمردة

ولكنها في نفس الوقت مشوقة

فإلينا بالمزيد أيها المتأنق

محبتي

ناديه حسين

08-10-2007, 01:55 AM

د. أحمد الليثي

08-10-2007, 11:06 AM

هي الحكاية أصلها جرة قلم
أنت ابتدعت الآه من دنيا الألم
لما قفلت السطر كانت تنشي
كل الحكايا من ألفها للكلم
ما كنت داري بالسياط تلفعت
جلد الندم
داخل سجن جاءت على صوت الحلم
ــــــــــــــــــ
أخي د الشاعر
تحية لك
مشاركة على قد الحال
ارجو تقبلها

أخي الفاضل الأستاذ محمد الحريري

ما في أحلى من اللي على قد الحال
دي القناعة والله ما تتوزن باموال
بس مين يقنع في زمن طغيان
واحنا فيه شيالين زي البغـ ...

د. أحمد الليثي

08-10-2007, 11:32 AM

الدكتور الشاعر : أحمد الليثي ،

أرحب بك بيننا وبهذه الرباعيات الرائعة ، أنت مبدع أيها الرائع .

وانا كنت شايف من بعيد واحد عليل

بص لعياله قام علوا العويل

هيموت يا عيني ، عمره ما بقاش طويل

الكرسي دا مقاسه ، مين يدور ع البديل

إن قالوا لي تشيِّش ولا تشرب سيجارة
ولا معانا تحشش ف غرزة ف حارة
ولا تاخد حقن أو تشم أو تشربها طينة
أقول وماله، بس شيلوا وش العكارة.

د. أحمد الليثي

08-10-2007, 11:40 AM

الأديب د. أحمد الليثي

رباعيات ليثية متمردة

ولكنها في نفس الوقت مشوقة

فإلينا بالمزيد أيها المتأنق

محبتي

مشيت على مهلي وعامل بنصيحة الوالدة
وسعيت ورا رزقي في روحة وف عايدة
وجالي الوحـوش لحد بابي كسـروه
واديني قاعد ف ركن واللمبة مش قايدة.

د. أحمد الليثي

08-10-2007, 11:54 AM

المبدع الشاعر احمد الليثي

حياك الله ومنور الاروقه

ابدعت اخي ولمست جرح الحقيقه ..رباعيات ليثيه واقعيه صح السانك

ده عصر حلق حوش بن المعلم جلا جلا
وان فهمت كلامي تبقى فهمت المسألة
و
فهمت المسأله وأوامر السلطان

لاعدمناك ودمت بخير

مين أنا جنبك يا زعيم القشقشة
يا عظمتك دا احنا عيشنا فرفشة
خلاص توبة ما هو امبارح فهموني
أيه لما ترمش وأيه معنى البربشة.

د. أحمد الليثي

08-10-2007, 12:24 PM

سايح ف أرض الله من بلاد لبلاد
مشحطط أم العيال، ومعاها كمان الاولاد
نفسي أرجع لبلدي، ويوم ما رجعت
قالوا إخوانجي وكمان من الموساد!

الخليل

09-10-2007, 03:05 PM

د. أحمد الليثي

09-10-2007, 04:43 PM

القاصد برباعيته الأولى الجبان الحذور !!
الليث الجسور والشهم الغيور الشاعر
د. أحمد الليثي

لطفاً سجل إعجابي برباعياتك..
وهي أكبر من أن أثني عليها ولكن كرمك حتماً سيغمرني لو تتقبل مروري
لا عدمناك.. وهاك مودتي وإحترامي .

أخوك .........الخليل

آه يا خليلي في وقت الخل شيء نادر
كان الصفا ف قلبي حقيقي مش عابر
بسطت إيدي بالسلام والنية خالصة
قطع إيدي وقال لي أصل الزمن غادر

د. أحمد الليثي

09-10-2007, 06:24 PM

د. أحمد الليثي

09-10-2007, 06:29 PM

اِمشي جنب الحيـط وبلاش لسان فالت
وان مال عليك الحيط ياما الحيطان مالت
حتى اندفِن تحتيه من غير لا قال ولا قالت
حرية أيه يا بني؟ دي إيد حكومة وطالت!

د. أحمد الليثي

09-10-2007, 06:42 PM

حطيت رحالي على اعتابك وقلت خلاص ترحـال
ورميت نفسي في أحضانك وضميت سهول وجبال
وبست الحجر، والشجر، والتراب، والنيل، والناس
دا حضـن الوطـن يا خوانَّـا ما تعوضـوش أمـوال.

د. حسان محمد الشناوي

09-10-2007, 10:47 PM

هات الرباعيات ورجع لينا أحلى كلام

ياليثي يا اللي كلمتك بتشق كل ظلام

اكتب وقول راح تستمع لكلامك الأيام

وان شا الله دايما نلتقي ع الخير وكل سلام

شاهين أبو الفتوح

09-10-2007, 10:57 PM

شاعرنا الكبير د. أحمد الليثي
إليك هذه الإشاعة :

عندك مناعة تفِل الحديد
عمرنا يقصر عمرك يزيد
سرطنت شعبك سلطنت إبنك
موتك إشاعة موتنا أكيد !

لإبداعك محبتي واحترامي
شاهين

د. أحمد الليثي

09-10-2007, 11:28 PM

شاعرنا الكبير د. أحمد الليثي
إليك هذه الإشاعة :

عندك مناعة تفِل الحديد
عمرنا يقصر عمرك يزيد
سرطنت شعبك سلطنت إبنك
موتك إشاعة موتنا أكيد !

لإبداعك محبتي واحترامي
شاهين

إن كان حـديد عزانا نار جهنـم تسيّحه
وان كان عنده مناعة بكره الزبانية تدبحه
وان كان في دنيتنـا سلطــان زمانـه
بعد موته بكره اللي مدحه ... يشرشحـه

د. أحمد الليثي

10-10-2007, 05:53 PM

ساعات أقول العيب في نفسي مش ف الناس
وارفض أطـاوع عقلي وقلبي والإحسـاس
واقول مَشِّيهـا كده بدون دليل وأسـاس.
واتلقَّى الطعنة من تاني واشرب بنفس الكاس.

حمدي ليلة

10-10-2007, 07:31 PM

ماشاء الله لاحول ولاقوة إلا بالله
أكمل أيها المبدع
متابع لك...

محمدعثمان جبريل

10-10-2007, 08:20 PM

"ما تقولش أيه ادِّيتنا مصر".

ليه ما اقولشِ؟ هو السؤال كان حُـرُم؟
افتخرنا بالفراعين وبسُّخرة بنينـا الهـرم
وصوَّتنـا للفراعين وعيشنا لسَّه ف عـدم
واترمـى ورا الشمس كل من قال إحِـم.
جميل
رائع
هو صحيح السؤال حرم؟
إشمعنى هما من كتر حبهم للسؤال .. سموا نفسهم مسئولين ..؟
أما عن حكاية الهرم و السخرة دى فيها كلام ... و حتى إسأل الاستاذ شاهين
محبتى و تقديرى
وكل عام وانتم بخير وسعادة

د. أحمد الليثي

10-10-2007, 10:24 PM

جميل
رائع
هو صحيح السؤال حرم؟
إشمعنى هما من كتر حبهم للسؤال .. سموا نفسهم مسئولين ..؟
أما عن حكاية الهرم و السخرة دى فيها كلام ... و حتى إسأل الاستاذ شاهين
محبتى و تقديرى
وكل عام وانتم بخير وسعادة

أخي الفاضل الأستاذ محمد جبريل
شكر الله مرورك.
أما موضوع السخرة، فلا أخفيك أني عملت في مجال المصريات أحد عشر عاماً. وصدقت في أن السخرة "فيها كلام". وبما أن فيها كلام تتساوى الاحتمالات. أما نفيها نفياً قاطعاً فهذا هو ما يستميت أهل التاريخ والآثار والسياحة في القول به على الرغم من عدم وجود دليل قوي دامغ ينفيها بنفس القوة التي ينفي بها أهل المصريات وجودها. ومهما كان الأمر أليس هناك احتمال بوجود 1% سخرة؟ فإن قبلنا بالاحتمال فبها ونعمت، وإلا فاعتبرها أخي من رخص الشعر.
دمت سالمــاً، وتقبل الله منا ومنكم.

د. أحمد الليثي

10-10-2007, 10:36 PM

شكِّني دبوس لئيم وسنُّه كده مصدي
رحت لطبيب الهوى قال لي كان ودي
أنا برضه قلبي كسير، والدمع على خدي
وان حبيبك خانك، علاجه مش عندي

د. أحمد الليثي

13-10-2007, 12:21 AM

قومي يا مصـر وقولي لي: ليه معاكي احتـار دليـلي
النهـارده مكشَّـرة، وف الماضي كنتِ بتضحكي لي
مش هو ده وشِّك يا غالية، حتى نيلك مش هو نيـلي
والناس كمان اتغيرت، ولقيت عـدو مكان زميـلي.

د. أحمد الليثي

13-10-2007, 12:22 AM

كان مـرة فيه لمبـة سُخْنَـة ومولَّعـة
جابوا طبيب الحميـات وقالوا متوجعـة
عملـوا لها كمـادات ميّـة متسقَّعـة
قام فرقعت م الغيظ ... نتيجة متوقعـة!

د. أحمد الليثي

15-10-2007, 01:21 PM

الدفن عند المسلمين حفرة تواري الجسد
أما عند الفراعين هرم يجيب الحسـد
وكل فار موكوس عمل علينا أسـد
إلهي يلف جيدكم بحبل أيه؟ من مسـد.

د. أحمد الليثي

15-10-2007, 01:22 PM

الدنيـا ماشيـة صاروخ ولسَّـه بتتعاجب
وانت تلـف تدوخ وبرضـه مش عـاجب
وغيرك ياكلها والعـة، وانت تطفِّـي لهـايب
خايف لسانك يتلسع، أصلك -يالبعيد- خايب..

د. أحمد الليثي

15-10-2007, 01:25 PM

أبكي زمان ولَّى ولاَّ ابكي زمان حاضر
وبأيش ينفع البكا وانا باللطم متحاصر
ديابة اتْجَمَّعوا وبينهشوا ... والجثة أصلاً فِ المقابر
ده اللي بنشوفه النهارده شيء ما يجبر الخاطر.

د. أحمد الليثي

15-10-2007, 01:40 PM

اصحى يا نايم، النومة طالت، وطول العمر مش مضمون
الضامن الرَّزَّاق، والرزق ما فيه حيلة، والحِيَل شكوك وظنون
والظن إثم، والإثم خيبة وندم، والندم ما فيهش سكون
والسكن زوجة، والجواز غالي، والغلا يصحِّي عيـون.

د. أحمد الليثي

15-10-2007, 01:44 PM

بيقولوا مصر باعوها وأهلها يا خْوَانَّا مش لاقية
أمال راحت فين الرشاوي والنهايب بلا قافية؟
والعمولات والإتاوات والنصب بالعافية؟
ولاَّ السرقة والاختلاس والمصمصة مش كافية؟

د. أحمد الليثي

15-10-2007, 01:45 PM

السؤال لغير الله قالوا مذلّـة متسجـلة
واحنا فْ مذلّـة حالَّة علينا ومستعجـلة
وِان قلت كيف الحال النهارده يا ولـه؟
تقول: الأَشْيَـة معدن. والحالة مِتْنَيِّـلَة.

د. أحمد الليثي

15-10-2007, 01:46 PM

فلاح بلدنا وعاجنـة البلهارسيـا جِتِّتُـه
أصل أبوه النيـل وشـرب من مَيِّتُـه
قالوا: ظلمت النيل! طب قولوا مين موِّتُـه؟
هي يعني البلهارسيا من اختراع حضرتُـه؟

د. أحمد الليثي

20-10-2007, 09:10 PM

كتب المصري القديم على الهرم الاكبر
أجره بعد الشقـا حزمة بصـل أخضـر
وعيش شمسي حطب سنانه معاه تتكسر
وشربه بعد العرق كوز ميّه وكوز مُنْكَـر*

* مُنْكَر: المقصود البيرة (والنقش المذكور حقيقة تاريخية ثابتة)

أحمد حسن محمد

20-10-2007, 09:35 PM

جميع كلامك دهب

يا أبو الجمال ألماس
يخلق في حسي العجب

حدّ الكلام ينباس

شاعر سياسي قلب

أوضاعنا في الكراس
لكن في وزن الدهب

يبقى العروض إحساس

محمد سعيد

20-10-2007, 11:09 PM

شخابيط ف رزمة ورق قال ايه بقى تخطيط

والربع قرن انقضت تخبيط على تخبيط

وآدى اللى صار واللى كان والعهده ع الراوى

إن التروس بطلت ولا عادشى قمح ف غيط

د. أحمد الليثي

مساؤك صحصحه:)

د. أحمد الليثي

21-10-2007, 08:57 AM

الحُـر لما يتغـرَّب يحمـل بلاده معـاه
والضحكة تتبـدِّل وتُصرخ م الألم جُـوَّاه
لا حد يمسح دمعته، ولا يواسيه في أساه
ويحلم بيـوم العـودة لاجـل ما تنسـاه

د. أحمد الليثي

22-10-2007, 08:01 PM

يا مين يسمع ندايَّ وصرختي
ويداوي آلامي ويمسح غربتي
تركت حبيبي ونور عيني هناك
وتركت ويَّـاه قلبي ومهجتي.

عصام مشعل

22-10-2007, 11:36 PM

قعدت في بيت الله اقرا آيات قرآن
واستنى صلاة الفجر وقلبي فِ اطمئنان
سحبني من قفايا العسكر وجروني لابو زعبل
وقالوا يابن اللئيمة، دي أوامر السلطان.

قعدت في بيت الله اقرا آيات قرآن = واستنى صلاة الفجر وقلبي فِ اطمئنان

سحبني من قفايا العسكر وجروني لابو زعبل = وقالوا يابن اللئيمة، دي أوامر السلطان

صاحب المقام الرفيع أخي الحبيب الدكتور أحمد الليثي

رباعيات جميله جميلة جميلة

وأستاذنكم في جمعها في صفحة واحدة وإعادة تنسيقها لأقوم بطباعتها

دُمت رائعاً أيها الحبيب

أخوكم المُحب لكم

عصام مشعل

د. أحمد الليثي

23-10-2007, 08:05 AM

قعدت في بيت الله اقرا آيات قرآن = واستنى صلاة الفجر وقلبي فِ اطمئنان

سحبني من قفايا العسكر وجروني لابو زعبل = وقالوا يابن اللئيمة، دي أوامر السلطان

صاحب المقام الرفيع أخي الحبيب الدكتور أحمد الليثي

رباعيات جميله جميلة جميلة

وأستاذنكم في جمعها في صفحة واحدة وإعادة تنسيقها لأقوم بطباعتها

دُمت رائعاً أيها الحبيب

أخوكم المُحب لكم

عصام مشعل

أخي الحبيب الأستاذ عصام
أسعد الله أيامك ولياليك.
انقل أخي ما تشاء وقتما تشاء ما دام في غير معصية اللـه.

وقد رددت على رسالتك إليَّ على البريد الخاص، ولكن بريدك الخاص لا يقبل رسائل، فعاودت إرسالها على بريدك الإليكتروني. فأرجو أن تكون قد وصلتك.
والسلام عليكم ورحمة الله وبركاته.

د. أحمد الليثي

23-10-2007, 08:15 AM

صرخت يا امَّـايَّ وصوتي م الصراخ انبـحّ
وقلبي ينزف والدموع م العيون تنسـحّ
لا في حد يسمعني ولا طبيب يداويني
ولا دمعة تجف، أنا حيّ ولا ميّت صحّ؟

د. أحمد الليثي

23-10-2007, 08:24 AM

غربة مرة تعدّي إنما غربة القلب ما تعدِّيش
حتى قلبي خدعني وقال لي "الغربة دي تهويش
والصبر عادة وأسهل م الصبر أيوه مافيش".
وآدي قلبي بيتحسّر، وبين ضلوعي يعيش.

محمد سعيد

23-10-2007, 10:01 PM

لحظة حقيقيه مؤلمه ف عنيها حبة امنيات
صرحه دفينه ف حضنها نام الوجع كدا من سكات
يا الف آه يا جدع
لما خيوط الليل تلفلف مشنقتتها ع الشوارع والحارات

محمد سعيد

23-10-2007, 10:03 PM

موجوع يا قلب الوليد بتعدى كرب لكرب
حزنان يا دم الشهيد دا اللى خانوك مش غُرب
آهين يا زمن الرجال والعزه كلمة حق
قولها بعلو الصوت لو موتوك م الضرب

محمد سعيد

23-10-2007, 10:05 PM

لحظة حقيقه مؤلمه مرت على صخر انفطر
حسيت بصوت مبحوح حزين بيحذر الطير والشجر
اخدتنى نوبه من الذهول ما بين اقول ؟
ولا اتوه وانسى كما بـاقى البشر

د. أحمد الليثي

24-10-2007, 01:12 PM

لحظة حقيقه مؤلمه مرت على صخر انفطر
حسيت بصوت مبحوح حزين بيحذر الطير والشجر
اخدتنى نوبه من الذهول ما بين اقول ؟
ولا اتوه وانسى كما بـاقى البشر

أستاذنا الفاضل الشاعر محمد سعيد
حضورك وتواجدك في الرباعيات شرف وأخوة أعتز بهما.
شكر الله لك، وزادك ألقاً، ونفع بك.

د. أحمد الليثي

31-10-2007, 10:58 AM

الغش دا طبـع ولاّ يا نـاس مُكْتَسَب؟
وليه الخسيس يترفع وللعُلا يتنسَب؟
وليه دنيتنا دُنيـا والخلق فيها وحوش
يتخانقوا على جيفة بدون حسب أو نسب؟

د. أحمد الليثي

31-10-2007, 10:59 AM

آآه! اليوميـن دول كترِت آهـاتي
من عيـالي، من مِـراتي، من حمـاتي
من الجـزار لمَّـا حتى بقيت نبـاتي
من الناس، ومن الهوا ... ومن حياتي

د. أحمد الليثي

31-10-2007, 11:00 AM

عديت بحـور م الشقـا من أجل حوريّـة

وبحر الغلابة بُكـا م الضيم، من العبـودية

وجَه الحبيب واشتكى، حط الحديد ف ايديّا

لا طُلْت لحظة صفا، ولا دُقت يوم حـريّة.

د. أحمد الليثي

29-11-2007, 05:39 PM

أويت لصخرة من تعب
مسَّها ضهري اتفشفشت لتراب
وقال الذر في لحظة غضب
ما يسند الجبل هذا العذاب

د. أحمد الليثي

29-11-2007, 05:42 PM

كل شيء يلمسه كفِّـي
يبكي دماً من شرايينُـه
ومهما أدراي ومهما أخفي
قهر الزمن سانن سكاكينُـه

د. أحمد الليثي

29-11-2007, 06:46 PM

مرة خليل يطعن ف ضهري
ومرة حبيب يغدر بأحلامي
ومرة صديق أفديه بعمـري
يبيعني رخيص غيباً وقدامي.

د. أحمد الليثي

18-01-2008, 08:23 PM

الدنيا زي البحر ... موجة ورا موجـة
موجة عالية، وموجة هادية، وموجة عوجة
وموجة ترفعك، وموجة تِنْدُغَك نوجـة
وموجة تايهة، وموجة تعملك خوجـة.

د. أحمد الليثي

18-01-2008, 08:24 PM

شابّ فافي رِوِش واسمه يا ناس مصطفـى
قالوا له بنات بحري ف الشوارع مستِّفة
القد الجميل، والدلع ياما، والنسايم مهفهفة
راح مصطفى ... خد بالقفا وشبَّعوه بستفة.

د. أحمد الليثي

18-01-2008, 08:25 PM

صنايعي مربي دقنه وعامل فيها شيخ أزهر
وهو غريب الشكل، قليل الأصل والمخبر
لسانه بيقطر كدب وحلنجي متأصل
عيب عليك اللحية ما دمت شيخ منصر.

د. أحمد الليثي

18-01-2008, 08:28 PM

ناس بتحلم بالورود، وناس حلمها كوابيس
تنكتب فيها الكُتب، وتتملي الكراريس
الورد ف حياتها ألم يتحط ع التوابيت
ويندفن ويَّاها، وحياتها، موتها فطيـس.

د. أحمد الليثي

18-01-2008, 08:29 PM

عصفورة كل كلامها زقزقـة وتغريد
ولحن جميل بيتهادي بطعـم العيـد
أسمع نغمها أنسجـم وقلبي سعيـد
وجَه شيطان الحسد، خدها معاه لبعيد.

د. أحمد الليثي

18-01-2008, 08:30 PM

فيه عيال معجـونة بميِّـة العفاريت
وفيه بنات مجنونة وغاوية ياااه تنطيط
وفيه رجال تندشّ دماغها جُوّا الحيط
أمَّا النِسا ولَّعهـم بجاز ونفـط وزيت.

د. أحمد الليثي

18-01-2008, 08:31 PM

أنا كل ما أقول الآه يطلع من الستات
أم العيال في البيت بتاخد ودايماً هات
ولما تيجي امها أغني واقول يا آهات
والبنت زي امهـا حيَّـة من الحيَّـات

د. أحمد الليثي

18-01-2008, 08:33 PM

قالوا بتحب مصـر؟ أنا قلت: متلخبـط
الجوع قارصني يا ناس، والقرش متزفلـط
والظلم عامم والبلد في إيد ضباع سـودا
وف كل طلعة خسيس ألقاني كده باهبـط

د. أحمد الليثي

18-01-2008, 08:33 PM

نزلت م السمـا نجمـة، خدتني بالأحضـان
بصوت رقيق، ولحن جميـل فكرني بالخـلان
قالت لي ما انتش لوحـدك، وابتسـم يا خيّ
فتحت عيني، ما سمعت صوت، ولا لقيت ألحان.

د. أحمد الليثي

18-01-2008, 08:34 PM

روحَّت بيتي لقيت أم العيال ساكتة
وَغْوِشِتْ قلبي وقلت دي ليلة مش فايته
مالك يا حبة عيني أيش عكّر مزاجك؟
قالت لي: غلّوا الخيار، وما رخَّصوا القتة.

د. أحمد الليثي

18-01-2008, 08:35 PM

مشيت على النيل لوحدي فارع وبتمخطر
لابس عباية وطربوش قال يعني بتنمنظر
شافني شايب كبير قال يا بني شوف ضهري
بكره ضهرك ينحني زيي، ويكون الخبر أخبر.

د. أحمد الليثي

18-01-2008, 08:37 PM

أنا مش عـارف ليه يا جمـاعة
مصـر الخير أهلها ف مجـاعة
فين أخـلاق النـاس العِتـرة؟
ليه كرامتنـا أخسّ بضاعـة؟

د. أحمد الليثي

18-01-2008, 08:40 PM

ليَّ عند الحكـومة مصلحة وانا مـوظف
رحت للافندي قلت يا سيدي لو تعـرف
دابت كعابي من اللف، واحنا برضه زمايل
قال لي إبّ بالمعلوم، أصلي م الكلام باقـرف.

د. أحمد الليثي

18-01-2008, 08:42 PM

باصحـى كل صباح أقوم أجيب الفـول
وافطَّر العيال وامهم وأهلي وكلي ذهـول
واخد العيال ع المدرسة، واروح طيران على شغلي
ويخصمـوا مرتبي، ومن شغلي كمان منقـول.

د. أحمد الليثي

18-01-2008, 08:43 PM

شابة جميلة لابسة ع الموضة ومتغنـدرة
حاطه أحمر وأخضر وحاجة كده مسخرة
ماشية من العجمي وسحبانا للمنـدرة
طيحت صالح أعمالنـا، ورجعتنا لـوَرَا.

د. أحمد الليثي

18-01-2008, 08:44 PM

طلعت في راسي فكرة، عجيبة جهنمية
اشتغل رقاصـة يعني سِنادة للماهيـة
لقيت وزير الثقافة بيقول يا عيني عليا
قلت الرقص مش عيبة، لكن "الثقافة" بليّة.

د. أحمد الليثي

18-01-2008, 08:45 PM

صاحبنا عمره ما اتوضى ولا صلى في يوم من الأيام
جاله رمضـان قال أتوب، وراح استحمى قوام
سمع الفجر لفع جلابيته، جت لنص الرجل ع السُّنة
دخل بيت الله ... شافـوه ... راحوا مقدمينه إمام

د. أحمد الليثي

18-01-2008, 08:47 PM

عجبي عليكي يا مصر كم فيك من المصايب مضحكات
أمين شرطة بيضرب، وموظف بيسرق، وأمهـات
مش لاقية لقمة للعيل، وأب دايخ، وشعب بيتفس آهات
وشيخ بيخطب، وعالم بتجري وراه الشرطة بالهروات.

د. أحمد الليثي

18-01-2008, 08:48 PM

ركنت سيارتـي وقلت اتمشى شوية ع الكورنيـش
جالي العسكري يجـري: "يا باشا هنا الركن ما فيش"
قلت: خلاص أركنها بعيد ما دام "النظـام" قال كده
قال: "سيبها، ولاجل عينيك كل شيء يمشي بالبقشيش".

د. أحمد الليثي

19-01-2008, 02:23 PM

الذلّـة ليك يارب الوجـود نعمة إيمـان!
والتـوبة تغسـل صـدا الذنب والأدران!
والدمعـة سكـة سفـر تمسح الأحـزان!
والـزاد ما يكفي الحمول في سكة الشقيان!

د. أحمد الليثي

20-01-2008, 03:03 PM

ليه في الزمن ده الناس بقت مسعـورة
تظهـر دناءة طبـع وهي مش معـذورة
والخِـل يغـدر، والأحبـة كتيـر بتخـون
والحق باطـل، وراية العدل مكسورة؟

د. أحمد الليثي

22-01-2008, 08:24 PM

ليـه يا قلبـي تعيـب عليَّـا حبهـا
دي هيَّ منِّي، وانا يا ناس منَّهـا
إن قست بلدي وسال الدمع من عيني
روحي تحِنّ، وابوس عينيها وكفَّهـا

د. أحمد الليثي

01-02-2008, 07:18 PM

حتى النعام بيجيله يـوم تترفع راسُـه
واحنا دفنَّـا المجد، وقلنا احنا حُرَّاسُـه
وِفْ عالمنـا اعتلى عرش العز أنجاسُـه
منين يجينا الشرف، واحنا مش ناسُـه؟

د. أحمد الليثي

01-02-2008, 07:58 PM

لولا الأمل في الله ما بتهنـا مشاربنـا
في الجُبن راحت لِحانـا ويَّا شواربنـا
طرحة نِسا ولبسنـا، والذل صاحبـنا
وكل نـدل خسيس آكلنـا وشاربنـا!

د. أحمد الليثي

04-02-2008, 07:16 PM

قوم كده اتوضى، وسيب الهم على بـابه
كريم بقلب العبد، هيزيله زي ما جـابه
عنده ثـواب الصبر، وتبقى من احبـابه
اسجد بقلب ذليـل، تلقى الفرح صـابه

د. أحمد الليثي

06-02-2008, 07:46 PM

علبـة كـادوه جـايّة لـي متوصيـة
بدون غـرض، لله، علبـة متوضيـة
صاحبهـا قال لله، محبـة إنمـا هيّـه
بس غمَّض عين، ونام يا سيدي شوية.

د. أحمد الليثي

06-02-2008, 10:44 PM

قول يا بحر الهوى فين هـيَّ مراسينـا
أمواج تزيد حزننا، وغيرهـا تواسينـا
ولحظة صفا تضمنا، ونسمة هوا تنسِّينا
عرفنا شط النوى، وطالت فيه ليالينـا.

د. أحمد الليثي

07-02-2008, 08:50 PM

عملوا لنا مركز قومي للمواليد
وغيـره إحصـا وبعزقة وتبـديد
وقالـوا نزبط عـددنا بالتحـديد
وسرقوا البلد وعيالنا اهُم مطاريد.

د. أحمد الليثي

10-02-2008, 09:15 AM

افتح لنا معبـر ياللا يا عبـد القـادر
يودّي أي مكان، ده الهم مالوش آخـر
دنيـا بؤس وضنا، والحظ اهـوه عاسر
لازم عشان العيش نكون ضباع وكواسر.

د. أحمد الليثي

10-02-2008, 09:16 AM

نسمـة هـوا تنعش نفـوس حـرَّانة
بسمة حبيـب تحيي قلـوب حيـرانة
كلمـة طبيـب تشفي جـروح وآلام
وانا اللي عـزّ الدوا، والدمعة سهـرانة.

محمد سعيد

13-02-2008, 08:08 PM

الحروف بتشيل معانى من قلوب كل البشر
مهما نشكى او نعانى نلقى وياها السمر
بس شرط الصدق طبعا والمشاعر كلها
الحروف هتشع نور زى بالظبط القمر

محبتى وتقديرى

لأستاذى : د. احمد الليثى

د. أحمد الليثي

13-02-2008, 11:02 PM

الحروف بتشيل معانى من قلوب كل البشر
مهما نشكى او نعانى نلقى وياها السمر
بس شرط الصدق طبعا والمشاعر كلها
الحروف هتشع نور زى بالظبط القمر

محبتى وتقديرى

لأستاذى : د. احمد الليثى

أخي الفاضل الشاعر الأستاذ محمد سعيد
أسعدتني زيارتك، كما أسعدتني مشاركتك.

آه يا صاحبي لو كلامك توعى معناه القلوب
والحروف زي البشر -فينا صادق أو كذوب-
مرة تيجي تشع نور، مرة كل قلوبها سود
لو قلوبنا نورت حروفنا تلمع في الغروب.

د. أحمد الليثي

04-05-2008, 11:50 AM

يا بحر النيل يا مِدَّاري ف عيون السُّمْر
يا كلمة حب تأمرني، ولِيـه الأمـر
رب الوجـود ، يا مقسِّم الأرزاق
ف الحب قلبي بيهتف لمصر العُمر.

د. أحمد الليثي

04-05-2008, 11:50 AM

ع الشط قاعد باشاهد صبايا الحور
شايلة زلعتها فِ خطوتها أتوه ف بحور
تمشي تتأنى وتستنى لاجل اعاكسها
ولساني عفّ، وفؤداي ف الهوى مجبور.

د. أحمد الليثي

04-05-2008, 11:51 AM

للنيــــل

واهيه بلطية بتتلوى في بطن هواك
تفكرني بسعدية وخطوتها تقولش شباك
يا سمــك قل لي مين علم التـاني؟
الأصل سعدية؟ ولا دي زفلطة أسماك؟

د. أحمد الليثي

09-05-2008, 10:41 AM

اشوف رجال من العمال على جبينهم
عرق لولي وابويا برضه كان منهم
وانا اليوم قاعد أبحلق وابصلهم
والدايرة تكمل، وأصل وليدي من طينهم.

د. أحمد الليثي

09-05-2008, 10:42 AM

عجبي على شاعر ما يعرف غير الأكاذيب
يمشي يهلل ورا ناعق بشكل غريب
عدو الحق، في الصنعة بينفخ كير
ما عاد يعرف لو حلفنا له محل الطيب.

يُمنى سالم

12-05-2008, 02:54 AM

د. أحمد الليثي

أعبر بطاقات رياحين وياسمين

أعلقها على جيد هذا المتصفح بكل تقدير

تقديري

سعود العبد الله

12-05-2008, 12:23 PM

متصفح مخضب بمواطئ المسك

شكرا شاعرنا الجميل د. أحمد الليثي

تحياااتي

د. أحمد الليثي

13-05-2008, 11:40 AM

زيارة يُمنى واخونا سعود زيارة ود
والفال بيمنى وعبد الله يجيب السعد
والقلب سالم، والمحبة دي فوق الحد
يسعدكوا ربي ويجمعنا في جنة خلد.

اللهم آميــن!

د. أحمد الليثي

10-11-2008, 06:26 PM

لقيت لي حيطـة انا جنبها ومشيت
ساكت في حالي لحد اهوه ما حفيت
وغمضت عيني حتى قالـوا عميت
وبرضه راسي اتدشدشت فتـافيت.

د. أحمد الليثي

10-11-2008, 06:28 PM

الحب ده ترباس ... ومش مقفول
القلب فيه شلال، والعقل ياااه مشلول
البنت فيه تتهبل، وييجيلها منه ذهـول
ويبقى الجدع تمساح، فجأة يكون دلدول.

د. أحمد الليثي

10-11-2008, 06:30 PM

يا عم سيبك م النســا
بلا لخبطة، بلا لحوسة
في الحب تبقى الواحدة شوكة
وانت فولة مدمسة.

د. أحمد الليثي

10-11-2008, 06:30 PM

في دنيا بمبي كلنـا تايهين
فوق وتحت، وشمال يمين
أصل الأسى على كل لون
وفي الضلمة تتبرجل التلاوين.

د. أحمد الليثي

10-11-2008, 06:31 PM

النيل ده تايه من زمان
يوم ما شربوه الحيتان
اللي ماشي ف أرض مصر
ميِّت وواكلاه الديدان.

سعود العبد الله

10-11-2008, 06:57 PM

أهلا ، أهلا بعودة الألق ، حبيبنا الغالي د. أحمد الليثي

سيطيب السهر مع حرفك الرشيق أيها الجميل

،،،،،،،،،،،،،،

دا انا مستني و عايش على نار

يمين و شمال تاخذني الافكار

نمت وصحيت متشوش والقلب احتار

دا انا كنت بصحرا ودلوقت ربيع ونهار

حبي لك أيها القدير

سعود

ناديه حسين

10-11-2008, 08:24 PM

هلا دكتور احمد

ازيك يارب يخير

ومنور المنتدى والله زمان يادكتور :)

وتسلم على الرباعيات الجديده مازلت ضد النسوان :)

لاعدمناك

د. أحمد الليثي

15-11-2008, 03:09 PM

هلا وغلا أخي سعود وأخت نادية.
شكر الله لكم طيب استقبالكم. وأعاننا وإياكم على ما يحب ويرضى.

د. أحمد الليثي

15-11-2008, 03:09 PM

اليوم أنا زعلان ومتضايق
وحتى نفسي والعيشة مش طايق
العيب دي مني، ولا دا حالنا
نعيش نموت وبالنا برضه مش رايق.

د. أحمد الليثي

24-11-2008, 08:40 PM

أصالح العفاريت، أبالسة أو شياطين
وكل خلق الله، العُقًلا أو مجانين
وكل عقرب سام، وأنكد التعابين
ولا احط إيدي في أيد واحدة م النساوين.

صلاح العسال

26-11-2008, 02:53 PM

الله عليك حقيقي رباعية واضحة وجميله
وفقك الله وامتعني بقراءات الليثيه دائماً

د. أحمد الليثي

27-11-2008, 09:34 PM

الله عليك حقيقي رباعية واضحة وجميله
وفقك الله وامتعني بقراءات الليثيه دائماً

الأخ الفاضل الأستاذ صلاح العسال
شكر الله لك، ويسعدني حضورك دائمـاً.

دمت سالمــاً.

د. أحمد الليثي

27-11-2008, 09:35 PM

فرج الإله نازل بشعلـة نـور
تزيح عنا الضلام وتمسح جور
إذا ما الخل يدبحني بحد السيف
أدعي لُهْ ربي واقول معـذور.

محمد رمضان هدايه

28-11-2008, 08:52 AM

د. أحمد الليثي

29-11-2008, 06:45 PM

دكتور / احمد الليثى
جميلةهى رباعياتك
ودعنى اتواصل معك برباعية على قدى
ولكنه التواصل الذى انشده
إفتح ببان الأمل وسّع لها الضلفة
تلقى النهار مكتمل راجع بيستعفى
والدنيا تفتح ايديها يا صاحبى بالأحضان
وان حتى مرضك عضال بالحب راح تشفى

أخي الفاضل الأستاذ محمد رمضان
شكر الله مرورك وتعليقك، وإضافتك الجميلة لرباعية يملؤها الأمل.

وإليك هذه الرباعية:

الصبر طيب، والله كلمة قالها حكيم
من يومها باصبر أنا ع الضنا والضيم
وكلمة مُرة يرددها خسيس ولئيم
وانام مرتاح ومتعوذ من شيطان ورجيم

محمد رمضان هدايه

30-11-2008, 04:15 AM

طول مانت قـلبك عمار والمولى نبراسه
ما تـخـافـش مرة اللـئيـم داللـؤم له ناسه
والخـسة زى الـتراب تـدهـسها بالأقـدام
وان زاد تراب حواليك تبقى انت كناسه

سماح

30-11-2008, 06:20 AM

الصبر ياهل القلم دا نعمة ف الأيام

يشتد بينا الألم تنزف جراحنا كلام

يحدف كلامنا ضيا على سكة المجاريح

يرتاحوا بعد الضنا ويعيشوا ف الأحلام

د. أحمد الليثي

30-11-2008, 07:52 PM

الصبر ياهل القلم دا نعمة ف الأيام

يشتد بينا الألم تنزف جراحنا كلام

يحدف كلامنا ضيا على سكة المجاريح

يرتاحوا بعد الضنا ويعيشوا ف الأحلام

الحلم أجمـل م الحقيقة
حتى لو كان عمره دقيقة
الدنيا شر كبيـر ولكن
أرواحنا لسه يا ناس بريئة.

د. أحمد الليثي

19-04-2009, 09:13 PM

الراحة دي مطلب ومش ميسور
من عهد آدم، م الظـلام للنـور
لو حد يعرف فين تكون الراحة
أحلف لاعدِّي لها بين جبال وبحور.

د. أحمد الليثي

16-05-2009, 12:45 PM

فينك يا صاحبي؟ وفين اللي كان
دا عمري، شبابي، وأيام زمان
بادوَّر عليهم وباصرخ عشان
تيجي تشاركني ويرجع ما كان.

أهداب الليالي

26-05-2009, 11:01 PM

الأديب القدير د. أحمد

على موعد مع الإبداع - نحن - أنّى أشرق اسمك .
دامت الرباعيات عامـرة بـ فيض التفرد

متابعـة و أزجي آيات الشكر
ودي
http://3n8aa.jeeran.com/BigRose.gif

أهداب

د. أحمد الليثي

26-11-2009, 01:25 PM

اقتباس:
المشاركة الأصلية كتبت بواسطة أهداب الليالي http://www.arweqat-adb.com/vb/s-arweqat/buttons/viewpost.gif (http://www.arweqat-adb.com/vb/showthread.php?p=77964#post77964)

الأديب القدير د. أحمد

على موعد مع الإبداع - نحن - أنّى أشرق اسمك .
دامت الرباعيات عامـرة بـ فيض التفرد

متابعـة و أزجي آيات الشكر
ودي
http://3n8aa.jeeran.com/BigRose.gif

أهداب

الأخت الفاضلة الأستاذة أهداب الليالي
شكر الله مرورك وتعليقك، وكم أسعد بإضاءة اسمك لمتصفحي.
تحية عطرة، ودمت في طاعة الله.

سيدة المطر

06-01-2010, 04:43 PM

أستاذنا الرائع ، الشاعر المجيد دكتور أحمد
حين تهطل ديمة حرفك ، يورق الشعر و تستحيل المساحات لوحة من ربيع ...
ننتظر رباعياتك أيها الليثي الأنيق :icon (22): فلا تتأخر :icon (22):
دم بألق و بهاء
:icon (4)::icon (4):

ولاء سعيد أبو شاويش

19-05-2010, 06:51 PM

تعـالَ اسمع كلامـي وركِّـز يا ولـه
أيام الفرح راحت ومش باقي إلا البهدلة
ده عصر حلق حوش بن المعلم جلا جلا
وان فهمت كلامي تبقى فهمت المسألة
***
صبرت صبر جبال، وشلت الحمول أشكال
ما نهقت كلمة لأ، ولا قلت مرة محال
لا رفسة للمفتري، ولا ضربة للحمَّال
ولما قلت "كفاية" قالوا حمار محتال.
***
رباعيات حكيمة وساخرة ورائعة جداً د. احمد الليثي
بارك الله فيك
ولا حرمنا إبداعك :icon (11):
تحيّتي

د. أحمد الليثي

28-05-2010, 12:12 AM

حياك الله أستاذة ولاء، وشكر مرورك الكريم.

د. أحمد الليثي

28-05-2010, 12:13 AM

اقتباس:

المشاركة الأصلية كتبت بواسطة سيدة المطر http://www.arweqat-adb.com/vb/s-arweqat2/buttons/viewpost.gif (http://www.arweqat-adb.com/vb/showthread.php?p=94584#post94584)
أستاذنا الرائع ، الشاعر المجيد دكتور أحمد

حين تهطل ديمة حرفك ، يورق الشعر و تستحيل المساحات لوحة من ربيع ...
ننتظر رباعياتك أيها الليثي الأنيق :icon (22): فلا تتأخر :icon (22):
دم بألق و بهاء
:icon (4)::icon (4):

شكر الله مرورك وتعليقك أختنا الفاضلة سيدة المطر
ولي عودة إن شاء الله.
دمتِ في طاعة الله.

د. أحمد الليثي

19-06-2010, 11:05 PM

الدنيا من حولي تضحك، والحزن ماليني
بتنصب شِباك الألم وفي الرايحة بتغريني
يا دنيا ضِقْتي وْمَا عادت ضحكتك تكفيني
ومن إمْتَى كان الألم وحزن القلب يشفيني؟

د. أحمد الليثي

21-06-2010, 10:21 PM

ابْكِي يا عينـي؛ دا البُكا تريـاق
للحـزن قلبي مِ الهـوى مشتـاق
وِانْ قالوا ليه الألم، والألم حـرَّاق
قلت عمري قضيتُه من فراق لفراق.

د. أحمد الليثي

21-06-2010, 10:22 PM

في المدرسـة قام المُعلِّم ... شَـرَح
القدس راحت، والأمَّة رقص ومرح
وعراقنا ينزف، واحنا نعمل فـرح
كفِّنْت قلبي، والحزن جُوَّاه طـرح.

ولاء سعيد أبو شاويش

21-06-2010, 10:34 PM

ابْكِي يا عينـي؛ دا البُكا تريـاق
للحـزن قلبي مِ الهـوى مشتـاق
وِانْ قالوا ليه الألم، والألم حـرَّاق
قلت عمري قضيتُه من فراق لفراق.

الله الله
دكتور وليث ومبدع وجميل :)ههههه:icon (22):
روعة يا د. احمد والله يسعدني جداً ان أقرأ رباعياتك الفائقة الجمال أستاذي الكريم .
تقديري المتواصل
:icon (11)::icon (11)::icon (11):

د. أحمد الليثي

22-06-2010, 08:27 PM

اقتباس:
المشاركة الأصلية كتبت بواسطة ولاء سعيد أبو شاويش http://www.arweqat-adb.com/vb/s-arweqat2/buttons/viewpost.gif (http://www.arweqat-adb.com/vb/showthread.php?p=103603#post103603)
ابْكِي يا عينـي؛ دا البُكا تريـاق

للحـزن قلبي مِ الهـوى مشتـاق
وِانْ قالوا ليه الألم، والألم حـرَّاق
قلت عمري قضيتُه من فراق لفراق.

الله الله
دكتور وليث ومبدع وجميل :)ههههه:icon (22):
روعة يا د. احمد والله يسعدني جداً ان أقرأ رباعياتك الفائقة الجمال أستاذي الكريم .
تقديري المتواصل
:icon (11)::icon (11)::icon (11):

الأخت الفاضلة الأستاذة ولاء سعيد أبو شاويش
شكر الله مرورك وتعليقك، ومجاملتك الطيبة، وأسعدك في الدارين.
دمتِ في طاعة الله.

د. أحمد الليثي

22-06-2010, 08:29 PM

الدمـع يجـري، والقلب لـه أحــزان
الوهن يســري، تستسلم الأبـدان
والأمة تِحْبي طول ما العزيز متهان
وفِ الزحمة نلقى حقنا ... غلطان.

د. أحمد الليثي

25-06-2010, 06:33 PM

يا مين يقول لي الألم ف عيشنا ليه بيدوم؟
وليه يا جرح الزمن بننام عليك ونقـوم؟
بلسم جراحنا أكيد مدفون في بحر عميق!
يا ترى اللي تايه أنا؟ والاَّ الأمل معـدوم؟